تحياتي لمن دمر حياتي!!

اريد اعلن حداد وللعشك ماعود
واريد انساك وانسه البينك وبيني
واشك دفتر غرامك خاطر انه انساك
وادير الوجه عنك من تلاكيني
ماريدك بعد لو انته روحي تصير
ملح بعيوني احطن ونسه حته النوم
اخافن بلحلم طيوفك تجيني
واذا شافتك عيني وفرحت بملكاك
والله اتبره منه وهاي موعيني
واذا صافحك جفي بحجة الخملان
اكص ثنين اديه يساري ويميني
واذا كالولي دم حبك يجري بالشريان
ثق بالله اكطع كل شرايني
واذا صاير شمس انه ابقه دوم بليل
وما اريد الضوه وبضلمه خليني
تذكر من لكيتك والعطش واليك
وكتلي امعود ارجوك رويني

عصرت اجفون عيني وشيليت ادموع
وشربتك بديه وانته تدريني
ومن مرني العطش صرت انته جربت ماي
كصدتك معتني ومديت جفيني
وانته بكل وكاحه وكل صلافة عين
درت بجفوفي سم وردت تنهيني
تذب نفطك عليه وانه بيه النار
وتتحمه اعله ناري وماتطفيني
وصرت محبس بديك وكمت بيه تسوم
ساعه تبيع بيه وساعه تشريني
اضل خصمك وافضحك حته من اتموت
على كبرك اخطن بايك سنيني