آنــه البصره

آنــه البصره

الى مدينتي الحبيبه الفاضله


آنه البصره المدينه الفاضله الفيحاء

آنه الكثر الدمع سولف مصايبها

آنه الحلوه الرقيقه الفاتنه السمراء

آنه المايوم كرهنها حبايبها

آنه العندي كصايب من نخل جيكور

وآمس بآخر حرب كصو كصايبها

آنه المحد لمسني وآنه بنت بيوت

لجل ضلي زلم لزمت شواربها

جم مستكشف ومستشرق ورحال

سولف ماكدر يحصي عجايبها

آنه كبل المدن لوبزغ خيط النور

يجي خيط الشمس بخدودها ايحبها

آنه المالحه الغزرت باالبذات

ياكل خيرها وبليل ينهبها

آنه حروف ابجديه من الألف للياء

وكل علم النحو ماكدر يعربها

آنه الوكلت جاري التمر والجمار

وعيالي كلو بس من نوايبها

آنه حنت الفاو بجف المعرسات

تطيهن فرح ودموعها بخدها

ركظت ابلا وعي وساعديت الطاح

طحت محد ركظلي وكال أساعدها

أنعد بالتبرع بأول الأسماء

بس وكت العطايه محد ايعدها

آنه ام الصدر أم الفزع خيال

هد بغيرته ومارضه ايلبدها

سستانيه آني وكاظميه غيض

والسستاني أبوها وخالها وجدها

آنه مريم العذره البلكنيسه تنام

مد أيده المسيح وكام كعدها

آنه الماقصرت بالواحد وتسعين

أنطيت الولد من كبل مولدها

آمس علكو ولدي قطع عالحيطان

ومن حزني قطع مصبوغ أسودها

آنه اجمل قصيده بدفتر السياب

يقراها الجبل والهور رددها

كحل عيني غزل ورموشي موالات

وسيوف الكحل برموشي مبردها

آنه بلقيس دوله بحضره سليمان

آنه اول خبر بشفاف هدهد ها

آنه اغنى مدينه وأفقر البلدان

وظل سوط الفقر كل ساع يجلدها

آنه اربات المضايف والحجي الموزون

آنه أم الشعر لوردت تنشدها

ماهزيت أبني ولاغفه بكاروك

صاحتله المنصه وراح يصعدها

خشم سمره وقدر الفشكـ من ايثور

ماحب المواضع ولبد بسدها

المواضع بيه تلبد من يصير ازماط

خاف يكول واحد غيرة ماعدها

خاف يكول واحد غيرة ماعدها


مما راق لي

تقبلوا تحياتي



(((((((((((منقول)))))))))))