انت العين

للشاعر عباس جيجان

انت العين

انت العين واقرب من جفنها انت

انت الوالد اليحظن بديه وليده وبنته

وبالتوحيد انت الشعب كله بشيعته وسنته

منهو الكال ناسيك هم ينسى الكَمر وكته

لو نبض الكَلب يتذكر لدكته

بس عشكَك عشكَ مفضوح

وعشك الناس كلها مساتر وسكته

صرت انت سبت وبركَبة يهودي

هم شايف يهودي يجوز من سبته

انت الفارس اليسبق هبوب الريح

وما اظن خيل سابقته

وانت انت يرهم ترابك كحل للعين

ودوا للما شفت علته

ومن طينك نحني جفوف المعرسين

وكل اصبع فرح من تك طكَته

وانت ريحة ترابك ترد الروح

هيل وزعفران وعنبر بشمته

ومثل تراب كاعك مالكَينا تراب

يرهم للصلاة من طين أتربته

انت ينام بيك المرتضى الكرار

ابو الحسنين التلوذ الناس كلها بشارته وبخته

وانت ينام بيك بكربلاء حسين

الما باع نطاقة وسلم ركَبتة (رقبتة)

وبيك ظلت راية العباس

لمن طاح ..... نزل اله الفرات وباسة من شفتة

من طلعت منك يوم طرني البين

كلبي وياي ماجبته اثاريني نسيته هناك عندك كَلبي امنته

شتلته بجرف دجلة الخير

وي طين الشواطي شربكَته

وامتدت عروكَه بوسط ذيج الكاع

ومن ماي الفرات ودجلة عمدتة

ولمن صار ينقل جدمة بين الناس

اخذته وياي للكاظم على الشباك زورته

صح هسه اصبحت من وطن نيدرلاند

هولندي الهوية وشعري جللته

وصح تاقلمت وية الغرب فد نوب

وصرت ماصخ مثلهم والملح عفته

وصح صرت ارطن رطنهم لمن يرطنون

ولسان العرب بالاعجمي كسرتة

لكن مدري شي يصير بيه من يمر طاريك

احسة انك دفو تموز وحرته

العالم نسى ايام اهدعش من ايلول

وصارت بيك وبيك سالفته

ناس تكول لازم نحتويه ونشفط البترول

ونعوض الراح ونسرق بركته

وناس تكول لازم هالحصار يدوم

وناس تكول لازم ننزع اسلحته

وناس تكول خطية اطفالة ماتو من الجوع

وناس تكول حيل وياه ما حمد ربه وشاكر نعمته

جيف انت حلو والدول منك تغار

ما عدهم العندك من مجد نلته

انت اول وطن ادم وضع جدمه علية وكال يا الله ولنك وصلة من جنته

انت اول وطن حطة النبي ابراهيم ودعا ربه يصونه برحمته وعزته

وانت اول وطن مرسى لسفينة نوح

وانت اول وطن النبي ايوب ناخت بيك راحلته

وانت اول وطن علم العالم ابجدية ويكتب التاريخ

وانت اول وطن قانون سننته

انت اول وطن كالتله الشمس يمه صباح الخير

انت اول وطن ماتشبه الاوطان

سبحان ربي شلون صورته

صورته العراق وبس علينه يلوكَ

واحنه نلوكَله لمن يحن وكته

هذوله اهل الغدر من عندك شيردون

يا هو صاح منهم ما اجو عندك

جان جيبك موس الك لمن العرب ينخوك

عزيز المال هيج وهيج طشرته

لمن طحت محد اجى وكال عدعيناك ونزفك مثل دمع الشمع سفقته

بقيت وحيد مرمي بساحة الميدان واطفالك عليك بصفك ينوحون

وانت تون ولا مثلك قبل مذبوح ون ونته

توجيت على جرحك كمت مهتميت

خاف الشامت يشوفك طريح ويشتفي بشمته

طبع بيك المكابر اكبر من الاه (بس)

واكبر من غدرهم يا بختك انته

جم غازي مر عليك وراح

وتمر عليه السنين ومتعمر بذلته

صفو بالمزبله ويلعنهم التاريخ

تراب بلادنة يرفض جدم الغازي والمحتل

تراب بلادنة غالي واغلى من عدنا

تراب بلادنة غالي واغلى من عدنا

والسلام