دردشة ومنتديات البصرة أم الخير
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي
بحـث
 
 

نتائج البحث
 


Rechercher بحث متقدم

المواضيع الأخيرة
» اجمل ما قيل عن الصبر
الخميس أغسطس 23, 2012 7:44 pm من طرف بلال ابو عباس

» اهلا بالاخ ( عباس علي)ومرحبا
الخميس أغسطس 23, 2012 7:25 pm من طرف بلال ابو عباس

» اهلا وسهلا بالأخت شيعية وافتخر
السبت أغسطس 04, 2012 3:35 am من طرف بلال ابو عباس

» شرح بالصور حول كيفية ظهور الاسماء طلاب الصف الثالث متوسط
الثلاثاء يوليو 17, 2012 4:56 am من طرف nba5

» نتائج الصف الثالث متوسط 2011 البصرة
الإثنين يوليو 16, 2012 5:15 pm من طرف makki

» اجمل نكات عراقية
الأحد مايو 06, 2012 4:33 am من طرف عباس البصري

» من أروع قصائد الامام علي (ع)
الأحد مايو 06, 2012 4:16 am من طرف عباس البصري

» اكبر عدد من فضائل الامام واقوال الامام الحسن عليه السلام
الأحد مايو 06, 2012 4:09 am من طرف عباس البصري

» اهلا وسهلا بالعضو عباس البصري
الإثنين أبريل 30, 2012 1:04 am من طرف رافد الربيعي

مكتبة الصور


منتدى
التبادل الاعلاني
احداث منتدى مجاني
تصويت

ابوذيات عراقية

استعرض الموضوع السابق استعرض الموضوع التالي اذهب الى الأسفل

ابوذيات عراقية

مُساهمة من طرف ريام الحورية في السبت يونيو 18, 2011 7:17 pm

مشيت وشوككم عتني وردني
مسحت الدمع بجفوفي وردني
اذا مكتوب من عدكم وردني
مثل ميت ترد الروح بية


اعطش گلبي اعله شوفك ماتورده
وحته اخبار منك ماتورده
اذا غصني بربيعك ماتورده
بخريفك شنتظر غير المنيه


نخيت الله بحسن عطفه يشملاك
وعطر من طيب جناته يشملاك
عسى لا بالحشر ربي يشملاك
وتصير الجنه دارك دوم هيه



يبنية حسي بحبي وشعري
وگلبي شيب بهجرچ وشعري
لغيرچ ما يصح نثري وشعري
ولو كل الشعر ما يوفي اللي بية



ضوينة بسنة المهاجر سفرنة
لباب البحر كلطنه سفرنه
اذرة ودخن ما جرن سفرنه
سيل ضيوفنة بسنة الردية


تمر وعلي ساترهه بختهه
حچت ونار البگلبي بختهه
بخت من كال بدلهه بختهه
شلون الذهب والفضة سوية



انا الواضح والمبين ولاخاف
وانا لمارجفن جدامي ولاخاف
وانا المانكص وزني ولاخف
اختفيت وخفت خف وزن العليه



حميتك دافعت عن ورحماك
الطعن اهون ولالوذن ورحماك
كلت اوليك ماعوفك ورحماك
وليت وطيبيتي عمت عليه



اسمك دوم بلساني ورد بيه
وعلى دربك كمت رايح ورد بيه
كل ضني الصخر يطلع ورد بيه
اشمه ويخف كل الهم عليه



احذر ياقلب تسمع وعدهن
شكثر دكات احسبهن وعدهن
يضل الفكر هاجرني وعدهن
بعكل مجنون مدري شصار بيه



على شلكم يهل عذال ينصاب
تعذلوني ودمع العين ينصاب
يطيب الي بضربة رمح ينصاب
لجن جرح اللسان البيه اذيه



صارلي سنين احبك وانت جاري
هلي منعوني وصـلك وانت جاري
الناس ورود خــده وانت جوري
خاف تذبل من الزمـك بين ادية



يمن هجــــرك بلب احشاي وسم
يخايب ليش بيـــه تبيع وتسم
اخير الروح بين الخنك والسم
السم والخنك رادتهن ســـويه


افتراضي محاورة عتاب بالابوذية
احباب الوكت عن عيني بعدكم
وسكاني الصبر حنظل بعدكم
اخبروني يضي عيني بعدكم
عالعهد لورتو لجنابيه


بعدنا نهيم برسومك بعدنا
شما دار الوكت بينا وبعدنا
اذا بالظيم حالتكم بعدنا
ترانا بغيبتك شفنا العذابيه

صاحب هالوكت النه ولادار
ولاكاع البعد تجمعنه ولادار
لا وكت الذهب مرنه ولا الدر
كضينه ايامنه ابهم واذيه



منو مثلي علية دارو خوانه
والدنيا اطلعت بس وياه خوانه
اخذ خاوة الزمن منه خوانه
وخلة الأخ ولا يعرف اخية



انه اتعلمت عالغدر روحي
وروحي وين ما تردين روحي
اذا طاب الج هذا الجسد روحي
وبعد ما تلكين شي يرهم علية




شلون الشاة ويه الذيب يربه
وصديجك لو توده دوم يربه
اليتيم العد شريجه شلون يربه
تسطرة ولا تكول عليه خطية



العنب من كال عالي ما طليته
والزمن ما خفت منه ما طليته
وجهي نفسة وجهي ما طليته
ولبست الجينكو لليمر بيه



انه اشا صحت بالصيف شارب
وانه من الزمان سموم شارب
شفت فلوس اجت طولت شارب
فلوسك وانته فدوة تروح اليه


دهري اليوم حشدهن سرايه
سرن بالروح واتنطر سرايه
هو الشيب من يعلك سرايه
رفع اعلان حتما للمنيه


حاير واطلب الدربي دلاله
وكتي بنار خلاني دلاله
يربي اشلون مرمرني دلاله
تهت وانه الدليل اشلون بيه


اجانه العيد واحنه احباب عدنه
مضينه ومن جديد انكول عدنه
اليريد ادروس عن الوفا عدنه
نعلمه بلا ثمن وبلا هدية


شد وياي دهري وجمع حلفه
حتى الراد يرحم كام حلفه
جنت صاج وصرت ياحيف حلفه
كبرت ومابعد تنفع قضيه


هنجل كلبي من شافك .......... ودرباك
وحرت شلون اعلمنــــك ......... ودرباك
كضيتة زحوف شارعكم .......... ودرباك
زلغت الركب وعكوس ادية



العشك يهديب عمري ........... كلفاني
وحبنة بغير حبكـــــم .......... كلة فاني
سهمك من رميتــــة .......... كل لفاني
شك صدري وجزاني ورد علية



حبيبي انة منــــــــك ......... ونتة مني
وحس كلمن يون لك ........ ونتة مني
اجت احزان دهــــرك ........ وانتمن لي
وصرت يفلان مأوى لكل رزية



شكثر انة احسب لجيتك ........ وعدلك
وسهرت الليل اتانـــــــي ........ وعدلك
اريدن بيدي اعوجنــــــك ........ وعدلك
وعدلك لو متت مابين ادية



ابد ما اصطبيلــك .............. وانتبهلك
واحذر حيل مني ............. وانتبه لك
انة بأهلي ازامط ............. وانتة بهلك
واذا اهلك زلم هدهم علية



الاحبة روحي بروحة .......... مذابة
زعل وياي لـــو ادري .......... مذابه
ذبني بلا سبب وانة .......... مذابه
هجرني وصاح حبك بس اذية



عليكم من سلام الله .......... ورحمة
وحن عالكلب مــــــرة .......... ورحمة
اذا رايد اجر انــــــــــت ......... ورحمة
تعال انطيني بوسة وحن علية



اجيك بلهفة اتعنة ............. وهملك
ولتضن يوم املنك ............. وهملك
اذا ضنيت متأكـــد ............. وهم لك
لان ميصح متوهم صافي نية



كلمن كال سوف اعمل ........ وسبني
جنة بحجية شتمنـــي ........ وسبني
اكلة من الوطن اطلــع ........ وسبني
انة ابني الوطن بثنين ادية



الفكر من عقلي طار .......... شتمني
وعليك الما يشتمـــن .......... شتمني
بعد هالذل يروحــــــي ......... شتمني
تمنيت روحي تاخذها المنية



طبع اليحفر بصحـــــــــراء ........ يعراك
ومن طبع الشجر بالطين ........ يعراك
ومن طبع العراقي يصيح ......... يعراك
الك يغدي العمر فدوة وهدية



عطشان علة جرفك ليش ........ يماي
كل خصلة منكظهة تصيح ........ يماي
بعيد ابعد بعد لا تلفــــــي ........ يماي
اذا تلفي اشك ثوب العلية



بحجيك ليش بس وياي ........ شطيت
نطيتك دمع عيني تكول ....... شطيت
انة بدمع العيون اشطوط ....... شطيت
وصب دجلة وفرات بين ادية


الجميلة عليك لو مـــــــرت ....... قف لهة
قصيدة عشك من تمشي ....... قفلهة
احلفك كون من توصــــــل ....... قفلهة
تقفلهة بالف سركي علية



بت كلبي انكطع بلتك ....... وبتكم
ردت اندلة شارعكـــم ....... وبتكم
واجي خطاب لبتكـــم ....... وبتكم
غصبن عالعشيرة اخذهة الية



الحب بحجر سجيــــــــل ...... رجماي
ودمع لجفن فوك الوجن ...... رجماي
حبيبي لو طلب فد يوم ...... رجماي ( رقماي )
نطيتة الرقم والهاتف سوية



زوج طيور حبنة صفــــــن ......... بس تك
وصرنة للشماتة علـــــج ......... بستك
ما ادري شجاني وكمت ........ بستك
اعذرني عالجرالك مو بدية


يحلوة عيوني انتي ......... ونتي رمشي
لتزعليني منــــــج .......... ونه ترة امشي
راح انطيج رقمــــي ......... ونتي رمشي
بس يرمش اتصل مية بالمية


احبج حب جنــــــون ......... موطبيعي
وبطلي ابييع ثكلـــج ........ موطة بيعي
طبع الشهم طبعــي ....... موطبيعي
اغدر وانثني بسابع ثنية



صرت للدهر صكلـــــة ....... ونتة لاكة
وفرح مالاك اليــــــــــة ...... ونتة لاكة
يريت الوكت يفتـــــــر ........ ونتلاكة
احضنك والحضن موساد الية


العشك كاروكة يامة ............. لولة بية
وفرني شلون فـــرة ............. لولبية
احبهة وحبها خلـــة ............. لولة بية
ارجف لون طاري الحب مر علية


الك طوبة الليالي ........... ناولني
وعلى هجرك أأكد .......... ناوي لني
اذا يس ترضة ذلي ......... ناو لني
وما ارضة اذا حبك اذية



ورد قداح اهديلــــــــــك ......... وجوري
وريدن ضيمي احجيلك ......... وجوري
موجر والعشك كمـــــل ......... وجوري
وشبه بركان حبك صار بية
القلب الابيض غير متصل


تغيب الروح بغيابك واردها
كتاب جفاك من عندك وردها
روحي بفركتك يذبل وردها
شمس انت وتنور الدرب ليه


تلوعنة وشفنه كل حلاوتهم ومرهم
والروح تمشي على طوعهم وأمرهم
حبيبي دوه لجروحي ومرهم
تمنيته يجي ويحن عليه


همت وانسلب عكلي وزاد مرضاي
على المر ماشفت شخصة مر ضاي
لون بات الترف بحشاي مرضاي
لكه اكرب يهل مبعد علية


بسك لا تضل تشكي بهاماك
وتلوم العين وتعضعض بهاماك
اخذ طبع النخل وارفع بهاماك
واذا بالطين عركك هاي هية

لو ردت الحبيب اتشوفه ينشــــــاف
وطيبلك جرح بضــــــــماده ينشـاف
اخبرك بل حبيب اشلون ينشـــــــاف
بس ضيف الاميل وهاي هيــــه

سماح اطلب انا المنكم وهدنــــه
كمش بيد التعورنه وهدنــــــــه
جبل راكَع خجل جيتك وهدنـــــــه
اصير اتراب ونته اسحكَ عليه


وحك رمضان وأشرافه وكتبه
عليك يهل دمع عيني وكتبه
انه شماريد أهم خطك واكتبه
شدهني جفاك من غصبن عليه

وحگ اعيونك ورسمك وداعك
وحگ جلماتك الحلوه وداعك
يصاحب فرهَد ابروحي وداعك
انتلف ثلثين والباقي باذيه


عجب خلخال ساكك مايرنش
جبح ودموع عينك مايرنش
يرن منك مصايب مايرنش
كرهتك لوحياة تصير اليه


تعال اسمع ون النايات وون عود
يخويه امشي نرد للوطن ونعود
اذا باجر متت بالغربه ون عود
وتظل ابعيد عن ارض الوطيه

روحي من الهجر عجزت ولابت
حلفت بدار ماأنزل ولا بيت
ذكرك مابقى ب***ي ولا بد
انكطعت من كطعت الوصل بية

تلوج الروح ياأحبــابي وراكم
وعجاج الضعن سد عيني وراكَم
يدمرني الحلم بيكم وراكم
ويريت الحلم واليقــضه سويه.


وسط گلبي يظل طابع وسمهه
عسل صافي حلو مرهاوسمهه
صفيت متيه باسمي وسمهه
لان هيه النجم واني الثريه



الدنيا خلافك وحشه ومره
ولا منك بعد جيه ومره
صورك مره اضمنها ومره
اشوفنها توج نيران بيه


احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية
القلب الابيض غير متصل


بك ربطني وعمره منحل
مثل اللغزحاولت احله منحل
نحله واذبلك عسل من غير منحل
يلي انت احلى من العسل والسمسميه



يدهري شبيك بالله من صفاتي
صافي وجذب تلكه من صفاتي
الوفه والخير والحب من صفاتي
وصفات الكرم كلهن ذني بيـه



غرامك فتت المهجه وسلها
وسهم غدرك مرد روحي وسلها
نجوم ليلك حلفها وسلها
ماحب غيرك لاخر نفس بيـه



حبك بالكَلب حافر وناقش
وصرت نيران تحركَني وانا قش
اريد اكَعد وياك احچي واناقش
واكَلك لشوكت تقسي عليه



احبك واعتذر منك وناسف
جمال ابروحك امغربل وناسف
احط ابروحي تي ان تي وناسف
وافجر روحي اذا تزعل علية



المصبح انشده عليك والماس
عزيز واغلى من الذهب والماس
لون اكعد سويعة وياك والماس
ذرة فكارك ابره من المنية



رضيت بشينك وزينك وعابيك
وگلبي ما وعة بغيرك وعة بيك
اشور بيك تدريني واعابيك
عجب وانتة تريد تخون بية

ألك كل يوم أني أتعنه وصل بيك...
عنادك ويــــن يبنادم وصل بيك...
حبيبي وشايل بجيبي وصل بيك...
وبيك باجر ينطوني هوية

بيه جروح يصعب علي شلهة
وجور الوكت كل عضاي شلهة
الدنية وياي من غايات شلهة
خذت حيلي وبعد شتريد بية

عيوني من السهر مالت وسالت
وعليه احباب مانشدت وسالت
الف دمعه الجرت مني وسالت
ولا دمعه الجرت منكم عليه

نهار

دمعي عليك يجري انهار * وانهار
وجبل حبنه بجفاكم طاح * وانهار
اظل اسئل عليكم ليل ولنهار
حمامة شوگ ونتها شجيّه


سر وحزن غامض من تمرني
احبك واحب امرك من تمرني
شفيدك بله كَلي من تمرني
انا أمرمر ابشرك شلك بيــه


يون كلبي عليك * او ونته سكته
اذا تكدر تهيده * وانته سكته
اذا انتَ القطار وانته سكته
اظل متاني لمن تمر بيه


احبك واموت لو تحب غيري
تراويني الهضم وتكلي لا تغيري
ومن اعتب واكولن تكلي غيري
تروح تروح وهم ترجع اليه


أحبابي شلون حالتكم بعدنا
اشبدينا والوقت عنكم بعدنا
إذا انتم نسيتونا ترانا بعدنا
نذكركم كل صباح وكل مسيه



كياني لمشيتك يهواي * سلم
سلمنا عليك شبيك * سلـــم
وكبل جفوفي كلبي عليك * سلم
وگلب گلبي وگف طگلك تحية



عليك الحال ما ظل حال بعدك
وعليك الدمع خالص نزف بعدك
اجاني الموت وانت بهجر بعدك
تحب الموت اظن انت اليـــــه




سجاجينك بنص حشاي / لاحن
وعزف عود بدليلي الـــــك / لاحن
شنو گلبك صخـر .؟ لا سئل / لاحن
وانه كلبي نترس ضيم واذيـــه




انه بالهم شفتهه نجوم ظهراي
وبالحزن انكسر يا ناس ظهراي
صحت كافي بعد يا روح ظهراي
المن باقيه بدنيا رديه




العتب على الروح العتب عليها
تمشي وره الي جان يكذب عليها
امنت بي وانطيته عمري وراح عليها
والدمع تحت عيني وعليه



انا المالوم صارلي نهارين
ويدمع العين عالوجنة نهارين
ان كان الحب يا عيني نهارين
اعوف الزين واعيش باذية


تنيتك عالدروب وليش ماجيت
ونار البعد بلب احشاي ماجت
انا لولا حبيبي كان ماجيت
ولا عشت الليالي بونة خفية

اتدري
نخيت اعليك اهل الكنيسة والدير ...
يلي تصد عني الوجه واتدير...
لك هاي الدنيا تجيها ايام واتدير...
وتاليهه ترد ابدمعتك علية...




صرت يمك عجب مذموم حالي...
تسألني على حالي ؟اشلون....حالي...
تعب كلش حبيبي اعليك ... حالي
اطيبن لو تحط ايدك علية...




روى المن دمعي ولا راك...
والغيرك مانحل جسمي..ولا راك
اخاف اتطول غيبتكم ...ولا اراك
وقبل وصلك تبادرني المنية.....




حياتي عكب شخصك ...شلي بيهه
وجميع اعضاي صارت ...شلة بيهه
توديلي رسايل...؟ شلي بيهه
اريدن شوفتك ونكعد سوية



اضل انطر خيالك وفطر
غيابك للكلب هدم وفطر
صايم كظيت العمر وفطر
اذا شخصك يمر يا روحي بيه


وشكرا ننتظر ردودكم

ريام الحورية
مجموعة الاشراف
مجموعة الاشراف

عدد المساهمات : 105
نقاط : 2327
تاريخ التسجيل : 13/06/2011

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى