ابو ذيات حزن لعيونكم الغوالي

خلص يوم الحزن وانتظر غادي
وعليك الكلب مثل الجمر غادي
باجرمن يصير حساب غادي
شتكول لربك عل السويتة بية
.
.
هوينه ومن هوينه منهوينه
غشمه وما عرفنه منهوينه
اليوافي بالمحبه منهو وينه
اذا تلكاه احضنة بين اديه
.
.
على فراكج ياعيني ضل الدمع سايل
حرت اني شدزلج من رسايل
خلصت عمري عليج مكاتيب ورسايل
نشف حبري وماظل دم بيه
.
.
وينك يل جنت اناديك بسكوت
ودمع العين يجري عليك بسكوت
والك اني الي نطيتك نستله وبسكوت
عندك ببسي وتضمه عليه
.
.
صحيح بعيد بس كلبي شعر بيك
حزين وصبح بس يكتب شعر بيك
عجيب شلون باقي أسود شعر بيك
وأنه بفركاك ما ظل شعر بيه
.
.
صرت مرهون حبك وانت راهن
وعليه ايام هجرك ون تراهن
تجي مره انتواجه وانتراهن
منو الاكثر يحب ويود اخيه
.
.
حبك بالضلــع بسمار منــدك
وحـس كلبي يسولف بيك من دك
كمت اركـــض عالنقال من دك
لان ادري العزيز اتصل بيه
.
.
وكَع كَلبي بغرامك مات شيله
وترى كَلبي التعذب مات شيله
اخابر وانت تسمع وماتشيله
وينك ياحلو بس رد عليه
.
.
احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية
.
.
وحك الي خلق بلكونين آلاء
مثل عين الغزالة عيون آلاء
امد ايدي عليهه اتكول اوه لاء
تأدب لا تمد ايدك عليه
.
.
هسه العتب وياك ان اوانه
وعليك الليل كله انه وانه
يالتهدد بالنفاهه انه وانه
وينك مو طبك دهري عليه
.
.
جروحي تحرشن بيه وعالن
وانه الما كاشف همومي وعالن
بحلاة النوم فز كلبي وعا لن
اخوتي وربعي اجو جتاله اليه
.
.
أشوف الظلمه بعيونك تراضه
وبالعب يوم فركاكم تراضه
عوف الزعل كافي نتراضة
ونعيد ايامنا الحلوة سوية
.
.
الكلب عاف البشر كلهم والك راد
مشة مسافر تذكركم والك رد
عرب ما طيبو علتي ولاكراد
دواية انتة يهل مبعد علية
.
.
شفت بالطيف شخصك سالماني
همت ودموع عيني سالماني
علي تسأل ياصاحب سالم اني
عزيز وشوفتك شحت عليه
.
.
يكاس العمر ماظل وشل بيك
ويجرحي لشوكت تنزف وشل بيك
تكلي ليش متمرمر وشل بيك
تهت منهو اليدلني عليه
.
.
انا الواضح والمبين ولا اخاف
وانا المارجفت جدامي ولا اخاف
وانا المانكص وزني ولاخف
اختفيت وخفت خف وزن العليه
.
.
يعلمني زماني دروس .. ونسه
وعلى حالي بجت رضعان .. ونسه
انه الجنت للخلان .. ونسه
صرت مكروه محد يمر بيه